北海道之夏(七) – 道東三湖


日期 ﹕七月十日(下午)至十一日(上午)
行程 ﹕=> 阿寒湖 => 屈斜路湖 => 硫磺山 => 川湯溫泉 => 摩周湖

食完飯之後,我哋就向道東三湖出發。道東三湖係指喺阿寒國立公園範圍內嘅阿寒湖、屈斜路湖及摩周湖。當中阿寒湖較為出名同受港人歡迎。

尤其喺國產電影非誠勿擾播映之後,該區更成為國內同胞嘅旅遊熱點。

非誠勿擾

首站,我哋先去阿寒湖。一路上,仍然好似今朝咁大雨,而且愈行愈大霧。睇嚟,今日嘅行程唔多順利。

去到阿寒湖觀光船碼頭,得好少人,好静。望出去個湖度,天色昏暗,能見度亦唔高。見到呢個景象,好難幻想D人讚阿寒湖嘅景色好靚。我哋冒雨影咗幾張相就即刻返上車。

由於唔心息,決定沿住湖邊揸車望下。去到第二個觀景點,景觀都係差唔多。

我哋終於放棄,起程去下個景點—屈斜路湖嘅秘湯。沿途仍舊係有雨+大霧。突然間,見到好似有個湖喺右手邊,約隱約現。跟住,見到有個雙湖台觀景台嘅路牌,我哋馬上駛架車入去睇下。泊低架車後,我哋沿指示牌行上斜坡去到觀景台。喺霧中見到有一個湖喺山林間,有D騰雲駕霧嘅感覺,好神秘。

雖然冒住大風大雨嚟睇,都係值得。

揸多一陣車,我哋就到咗秘湯,佢係一個喺屈斜路湖邊嘅天然露天風呂。當我哋到達秘湯嘅時候,雨大致都停咗,但個天依然係烏雲密佈,睇唔到日落,仲幾凍,好彩冇諗過浸秘湯。

屈斜路湖

其實個秘湯嘅位置真係唔錯,喺正個湖邊,望出去海天一色,有置身喺湖中嘅感覺。

屈斜路湖秘湯
屈斜路湖秘湯
屈斜路湖秘湯

老實講,個秘湯已經一D都唔"秘密",因為連Google map上面都可以揾到佢嘅標記。雖然今日落住雨,天氣唔太好,但我哋到達嘅時候,就遇到四個日本男人啱啱浸完離開。相信好天會有更多人浸。

跟住,我哋就再沿住湖邊,向下一個目的地—沙湯—進發。同秘湯一樣,沙湯都係喺屈斜路湖邊嘅天然温泉,不過如果想浸沙湯,就要花D功夫,自己喺沙灘上挖個洞先可以浸。當你喺沙灘上面一路挖,就會見到沙中間有D水滲出,初初可能會以為呢D係普通嘅湖水,因為個沙灘就喺個湖邊。但其實D水係暖暖嘅温泉水,感覺好神奇。

屈斜路湖沙湯

好多人一家大細,帶埋帳幕喺度露營、燒烤同浸温泉。真係一個唔錯嘅家庭活動。

屈斜路湖沙湯
屈斜路湖沙湯

由於今日無日落睇,可以早D離開屈斜路湖,我哋就去埋附近嘅硫磺山參觀。未到硫磺山,喺遠處已經見到有個山谷喺度冒煙,駛得愈近,啲硫磺味就愈濃烈。

硫磺山

去到硫磺山,原本個停車場係要收費,但由於職員經已放工,我哋連泊車錢都慳返。其實硫磺山係屈斜路湖同摩周湖一帶嘅一座活火山,我哋可以近距離觀看個硫磺火山口。不過所謂火山口,我哋只係見到幾個黃色嘅洞喺度噴D煙出嚟,一D都唔覺係火山。

硫磺山
硫磺山

參觀完硫磺山,我哋就返酒店。今晚住嘅係川湯溫泉區嘅一間傳統温泉旅館,D房間同浴場都有D舊,同網上book嗰時見到嘅感覺唔係好同。不過啲職員嘅服務好好,好友善。

今晚嘅晚餐係喺酒店食日式料理,職員會事先問你想幾點食。我哋準時去到宴會室,見到門口已經企咗三位職員笑容滿面咁迎接緊客人。宴會室係一間約二千呎嘅日式房間,裏面只放咗四張枱。

個日式料理嘅菜式好standard,味道都OK。但因為要坐喺tatami上面,成晚隻腳蹺嚟蹺去,坐得好辛苦。

當晚再享受個川湯溫泉後就休息。第二朝,我哋就起程到摩周湖。今日天氣好D,無落雨,只係多雲。

其實,摩周湖除咗(曾經)係全世界水質最清澈嘅湖外,佢亦係一個出名神秘嘅湖。因為佢好多時間都係俾大霧包圍,睇唔到個湖面。

而我哋今次就體驗到佢神秘嘅一面。摩周湖嘅觀景台係喺山腰上面,當我哋一路駛上山,D霧就愈嚟愈大。當到達觀景台後,唔好話要分個湖係喺邊個方向,我哋連前面有D乜都睇唔真。唯有影兩張相就離開。

摩周湖
摩周湖

最神奇嘅係當架車一駛離觀景台範圍,D霧即刻散哂,真係有趣又神秘。 今次無缘見到摩周湖一面,唔知下次會係幾時?

This entry was posted in 北海道 and tagged , , , , , . Bookmark the permalink.

1 則回應給 北海道之夏(七) – 道東三湖

  1. Terry Liu 說:

    唉~成日都咁大霧架!如果係咁我地都有機會係咁@@

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s