北海道之夏(三) – 美瑛/富良野 (跟團)


日期 ﹕七月七日
行程 ﹕洞爺 => 美瑛 (西北之展望台、四季彩之丘) => 小樽

今日morning call比較早,因為今日嘅大部份時間都係搭長途車。食完早餐後,就要開始4個鐘嘅車程去美瑛/富良野。

架車行咗近兩個鐘,就喺個道之駅度落車休息,去洗手間。我哋就喺小食店買咗杯夕張蜜瓜雪糕試下。


北海道D雪糕果然好好味,試完蜜瓜味之後,忍唔住即刻買多杯雲呢拿雪糕試下,都好好食。

坐多兩個鐘車,終於到咗美瑛食晏。今日嘅午餐係自費,個團去咗個類似food court嘅地方。買嘢食可以自己到自動售票機買。我哋要咗一個㗎哩飯同—個豚丼試。結果係 …… 唔係好得 …..

反而外邊有檔小販賣白粟米,我哋即刻買嚟試。呢樣係我哋好想試嘅食物,原本擔心七月太早未有得食,宜家有得食,梗係高興啦。白粟最好食嘅食法係生食,一啖咬落去,好甜、好多汁,完全唔覺得佢係生嘅,味道好清新。

—條粟米賣四百円,導遊原本話下—個景點買會平D,提意我哋遲D先買。好彩我哋心急想食,無聽佢講,因為下兩個景點都要比佢貴,仲要係有價無貨,賣哂。之前買咗嘅團友認真好彩,因為如果今日食唔到,咁佢哋今個旅程都無機會食lu。

今日天氣唔錯,喺小販檔望出去,個天幾靚。

之後就去咗西北之展望台參觀,個景點無乜特別,不過聽講有幾套日劇同廣告都喺度取過景。

跟住,我哋就到展望台對面嘅小食店去"進行"任食夕張蜜瓜。睇到呢個行程時,我一直都懷疑個團係唔係真係有咁筍,俾你任食真正嘅夕張蜜瓜。到食完之後,我哋証實佢係貨真價實,真係好味到不得了。

憑我哋之後再食嘅經驗,夕張蜜瓜分三個等級,由低至高分為良、優同秀。今次任食嘅蜜瓜,都食得出有兩個唔同嘅品質,我覺得最低嗰隻都有優等。

—坐低,每人會分到四分之一個蜜瓜,食完之後可以再攞。未食夕張蜜瓜之前,—直喺度諗,點解佢咁出名,會有幾好食呀﹖一食落去發現佢果然同一般蜜瓜唔同。用匙羹筆落去,好淋、好多汁,食落去嘅口感,有D似牛奶布丁,但味道係清甜嘅蜜瓜味,好好食。最後我食咗五件,即大約一又四分之一個,可惜再食唔落。我老婆就食咗三件。

跟住,我哋就去四季彩之丘睇薰衣草。由於今年北海道天氣遲咗回暖,導遊話佢個幾星期前嚟嘅時候,連些少紫色都見唔到,話今日要睇下我哋好唔好彩。結果去到,D薰衣草真係仲未開,只係有好少紫色。嚟到富良野睇唔到薰衣草原,真係好失望。(當時心裏面唯有期望五日後我哋自助遊再返嚟嘅時候,D薰衣草會開多D,或者其他薰衣草原會早D開花。)

無薰衣草睇,唯有欣賞下其他七彩嘅花田,影下相。其實其他花都好靚、好壯觀。大部份團友都好快坐低休息,等上車。淨係得我哋兩個影足兩個鐘,最後至上車。

後來到我哋自助遊時先發現,原來其他農場/公園嘅薰衣草田都要比四季彩之丘早開,旅行社無理由唔知,真係唔明點解佢唔改去其他嘅農場,等D團友可以睇到薰衣草。七月嚟到富良野睇唔到薰衣草,真係有啲可惜。

跟住又再坐多三個鐘車,向小樽市進發,完結今日呢個漫長嘅旅遊巴之旅。

This entry was posted in 北海道 and tagged , , , , , . Bookmark the permalink.

1 則回應給 北海道之夏(三) – 美瑛/富良野 (跟團)

  1. Terry Liu 說:

    E~我黎緊6月中去WO,咪一樣冇得睇@@?不過我自駕遊可以去其他農場睇,請問係邊度搵到「邊度有花開個D資料架?」

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s