北海道之夏(二) – 登別/洞爺 (跟團)


日期 ﹕ 七月五日 – 六日
行程 ﹕ 千歲機場 => 登別 => 洞爺

旅行團行程一開始,我哋先坐個幾鐘頭車到登別,去參觀登別地獄谷。除咗地獄谷外,行程仲有個所謂嘅藥師如來像。車!….咪原來又係同一個景點。

唔 … 真係無乜特別,好普通嘅一個旅遊景點。只不過係個山谷有少少煙霧出嚟。(如果講類似嘅景點,我覺得喺摩周湖附近嘅琉璜山特別D。)

反而嗰日個天幾靚。

之後就返咗酒店等食晚餐。點知返到房,見到有兩個職員幫我哋舖緊日式床舖,好熟練,好快手。

之後就落咗去食酒店嘅自助餐(三大蟹宴、和洋壽司刺身自助餐)。個自助餐有好多嘢揀,仲有三種蟹任食。D蟹唔算話好好食,但已經好過香港D自助餐食到嘅,我食咗都唔少。其他食物普普通通,無乜驚喜。

較為特別嘅係有三款雪條,細細條,望落普普通通,但食落幾好食。

食完之後,我哋去咗酒店附近睇下、散下步。

跟住就到今日嘅重頭戲…..浸溫泉。呢個喺我哋今個旅程第一個浸嘅溫泉,亦都係最大、最舒服嘅一個。個溫泉浴場有好多個唔同泉質、溫度嘅池俾你浸,亦有個室外嘅池俾你試下露天風呂。其實浸溫泉真係幾舒服,我亦都好享受喺溫泉浴場沖涼,另有一番風味。(因為影唔個溫泉,放張酒店相頂住先。)

第二朝食完早餐,先去咗登別伊達時代忍者村参觀。個景點十分普通,自助遊一定唔會去。周圍影下相算。

反而走嘅時候,見到佢門口有棵樹長滿紅葉,幾靚。

跟住就去登別水族館MARINE PARK參觀,估唔到都OK喎。有王帝企鵝巡遊,近距離睇海豚同海獅表演,比海洋公園好睇。仲有水母、小丑魚同其他海洋生物,影咗唔少相。

跟住就到咗食飯嘅時間,呢餐係到所謂嘅蟹御殿海鮮市場食"毛蟹風味石狩鍋"。起程之前,喺網上search過,除咗D跟團嘅人有提過,根本就揾唔到佢嘅資料,好明顯呢個所謂海鮮市場,根本專做旅行團生意。结果一去到,個導遊二話不說,叫大家喺鱈場蟹池旁邊排隊,每組團友攞一隻蟹。我已經覺得奇怪,無理由會係免費咁筍,但係個導遊又真係無提過要俾錢喎。一問之下,每隻蟹要成萬三円。呢個價錢,如果喺香港買隻新鮮嘅,一D都唔貴。但喺北海道,有乜理由叫我用比喺千嵗機場仲貴嘅價錢買隻蟹。而且本身仲有個團餐,所以我哋只係叫咗light小小嘅嘢試吓 ﹕一個海螺刺身同生馬糞海瞻刺身。後來證明唔買隻蟹嚟食係正確嘅。

一上到餐廳,發現個石狩鍋湯底只得清水同昆布 (唔緊要,導遊解釋過,日式係噤), 跟住到火鍋料,得幾塊三文魚同幾隻唔係好新鮮嘅毛蟹腳比四個人分。基本上以香港嘅水準,做火鍋湯底都嫌佢淡。咁嘅份量,根本就唔會食得飽。(我哋從來無諗過今餐原來係等於唔包)

到兩個刺身,味道好一般,好失望 (個導遊之前仲係咁話啲海螺好食,叫我哋一定要試)…. 諗落,好彩無叫到隻蟹。而且到後來發現,佢啲刺身嘅價錢,比札幌同小樽魚市場嘅貴咗近兩倍。

食完飯之後,坐咗約一個鐘車去洞爺湖,架旅遊巴停咗喺湖邊15分鐘比你參觀同去厠所,只夠你影幾張到此一遊嘅相就要走。

跟住就去水果園,任摘車里子。今年天氣遲咗轉暖,連應該過氣嘅士多啤梨都有得摘….雖然已經係水尾。D士多啤梨好細粒,不過好甜。D車里子,同香港賣嗰D好唔同,唔係棗紅色,而係黃色或者橙紅色。摘咗好多,食得好飽,味道都OK (一於當下晝嗰餐係留肚食水果啦) 。

走之前,喺果園度買咗支100%純萍果汁飲,好好飲,比喺日本超市買個D好飲得多。

之後,我哋返酒店食自助晚餐(鱈場蟹、和洋自助晚餐)。呢晚個晚餐無"琴"晚咁豐富、咁多選擇。雖然都有鱈場蟹任食,不過好細隻、味道亦好普通。

This entry was posted in 北海道 and tagged , , , , . Bookmark the permalink.

4 則回應給 北海道之夏(二) – 登別/洞爺 (跟團)

  1. Terry Liu 說:

    跟團始終爭D,又好似迫買野咁!原來伊達村咁普通,好彩我一早PLAN左剩係去水族館,其實佢地既入場費都幾貴,成2千幾YEN一個人。

  2. CC 說:

    我想問吓你地跟咩旅行社? 同住咩酒店 ? 因我地都plan左7月尾/8月頭跟團去北海道

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s