北海道之夏(五) – 帶廣


日期 ﹕七月七日至九日
行程 ﹕千歲機場 => 夕張休息站 => 帶廣 => 吟壽司

喺機場攞車,需要搭接駁巴士到租車公司嘅辦事處,雖然唔係好方便,但係服務唔錯。

攞咗車之後,花咗D時間熟習個GPS。日本嘅GPS比歐洲用嘅好用好多,提供嘅資料詳細得多。而且只要輸入電話號碼就揾到目的地,慳返我好多事前準備嘅時間。


揸咗約40分鐘後,就到咗夕張嘅休息站。嗰度有間北海道物產店,售賣當店限定嘅夕張蜜瓜布丁,所以我哋趕住喺5點鐘佢閂門之前到達。

除咗蜜瓜布丁,佢仲有賣黑炭puff,亦都係出名嘅食物。但由於個樣太唔吸引,我哋最終無試到。我哋買咗一杯夕張蜜瓜粒,蜜瓜雪糕同埋蜜瓜布丁食。D蜜瓜粒雖然係一早切好雪住,但味道一樣好好味,又林又清甜。

個蜜瓜雪糕,我哋覺得佢比早幾日,喺去美瑛嘅休息站食嘅,蜜瓜味更濃、更好食。而杯蜜瓜布丁我哋留番夜晚先食。(個布丁都好好食,感覺好似食緊夕張蜜瓜味嘅milk top布丁。)

之後我哋繼續駕車上路,一路上斜,就愈來愈大霧。到後來,大霧嘅程度,直頭見唔到前路同近距離嘅車,都幾危險下。

到咗帶廣後,首先返酒店泊車同check-in。酒店嘅停車場係儲物櫃形式,我哋首先將架車駛入架 lift 度,然後職員就會將架車送去空置嘅slot,都幾得意。攞車嘅時候,只需要俾番張飛仔個職員,佢就會將架車送番到部 lift 度。

放低行李後,我哋即刻出去食晚餐。行過附近有間出名嘅甜品舖"柳月", 就買咗幾件佢有名嘅"紅豆餅"作為第二朝嘅早點。(味道都唔錯,唔喺太甜,還可以。)

帶廣柳月

今晚晚餐揀咗吟壽司 ( 喺和味無窮介紹嘅餐廳),出名嘅食物係十勝產嘅生牛肉壽司卷。有朋友食過話好得,又有同事試過話唔掂。由於帶廣唔係話有咁多心水食店,我哋最終都揀咗去試。

間舖頭細細哋,只有約十四個座位。我諗由於當時日本播緊林志玲主演嘅日劇,店內掛咗張佢到訪嘅相喺當眼處。

一坐低,我哋order咗一客生牛肉壽司卷同一客手握雜錦壽司。我哋首先試咗個生牛肉卷先。一啖咬落去,老實講個口感同味道都唔係我哋想像中嘅生牛肉卷,但係味道都唔錯。其實,我同老婆多數都係食牛扒,好少食生牛肉,唔係好識比較D牛肉。

個牛肉卷嘅材料除咗有紫菜、生牛肉同壽司飯外,佢仲加咗海膽、蟹虸、帆立貝、蟹柳、吞拿魚。食落去,D味道配搭得都唔錯。

跟住就食D手握壽司,有幾款嘅味道都唔錯 ﹕帆立貝、蝦、蟹柳、魚子,其他就普普通通。

兩個人食兩客壽司,都真係幾飽。

今晚住嘅酒店係Dormy Inn。成個行程,我哋會有四晚住喺Dormy Inn,兩晚喺帶廣、兩晚小樽。住過之後,我哋對呢間酒店集團好滿意。佢嘅房間雖然唔算大,但裏面設備齊全,而且好乾淨企理。佢兩間酒店嘅設計都差唔多,都有温泉浸。最貼心嘅係,佢有提供洗衣機同洗衣液俾你自助洗衫,仲要係完全免費。除非你需要獨立乾衣,咁先至要入一百円coin入部乾衣機度。而且溫泉場外仲放咗好多漫畫書俾客人睇,好細心。 另外,仲喺每晚9-10點免費提供"小福"(即mini拉麵)試食,最好就喺浸完溫泉後食,食完暖笠笠返房訓。

第二朝一早,我就要揸車出發去釧路同阿寒。其實成個行程,我哋會住兩晚帶廣,主要都係途經,作為來回釧路時嘅驛站,同埋為咗試下帶廣出名嘅豚丼。

This entry was posted in 北海道 and tagged , , , . Bookmark the permalink.

1 則回應給 北海道之夏(五) – 帶廣

  1. Terry Liu 說:

    我都會係帶廣度住一晚同食佢既豖井,點解冇去六咩亭既@@?

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s