北海道之夏(八) – 釧路濕原


日期 ﹕七月十一日 (上午)
行程 ﹕=> 釧路濕原

下一個目的地,係日本最大嘅濕原—釧路濕原。由於濕原嘅面積好大,而我哋對自然生態又唔係有太大興趣,所以我哋只係去咗幾個景點參觀,無揀到坐艇仔遊濕原或者搭濕原列車。

我哋先到塘路駅參觀。塘路駅係位於釧路濕原最大嘅塘路湖旁邊,亦都係夏天濕原列車嘅總站。

塘路駅
塘路駅

跟住就去展望台。展望台位於山坡之上,我哋由山腳徒步行十幾分鐘上斜坡同樓梯至到個台,都幾係嘢!

個展望台係一個木造嘅高台,起係山丘之上。登上高台,可以遠眺廣闊嘅濕原同塘路湖,景觀唔錯,感覺好舒服。

下一站係釧路濕原心臟位置嘅細岡展望台,由塘路駅揸車過去要大概半個鐘。

就快要到達觀景點嘅時候,條路變得愈來愈狹窄同崎嶇,附近嘅景物亦换成河流同草叢。喺河邊望出去,境致都幾怡人。

終於到達展望台範圍。今次行約八分鐘就到觀景點,而且今次條路比較平坦,好行好多。
到咗觀景點,視野十分瞭闊,我哋可以一百八十度俯瞰濕原,正﹗

由於無安排太多時間喺釧路濕原,短暫逗留之後,我哋就趕住返釧路食晏。

早兩日食完和商市場嘅海鮮,今次就試下釧路有名嘅爐端燒。原本係想試一間由老婆婆主理嘅元祖爐端燒,但由於佢只開晚巿,我哋無缘一試。結果,我哋就揀咗楝瓦爐端燒。

呢間爐端燒同其他嘅有D唔同,D食物係由客人自己燒。一坐低,我哋order咗個海鮮套餐。個餐有好多嘢食,大魷魚筒、蠔、帆立貝、魚、豬肉、雜菜、飯團、薯餅,望落好吸引,而且份量都唔少。

楝瓦爐端燒
楝瓦爐端燒

雖然D海鮮要我哋自己燒,無專業嘅師傅代勞,但結果D食物樣樣都好好食,令我哋有D喜出望外。當中,大魷魚筒、蠔同個飯團尤其好食。

楝瓦爐端燒

不過,間店嘅服務態度就認真差,同我哋全程係北海道所接觸到,有禮貌而周到嘅服務有極強烈嘅對比。

由於早上濕原嘅風景好靚,我哋逗留耐咗,所以到達楝瓦嘅時候,已經係一點半。唔知係咪因為接近佢嘅打佯時間,負責送菜個待應態度真係唔多得。佢放低啲嘢食就同我哋講一堆日文 〔應該係講解點樣燒〕,我哋示意話唔識聽日文,佢個樣即刻變得好難睇兼且毫無笑容,之後就攞咗擺起張枱上面嘅燒烤夾做咗啲動作示意叫我哋自己燒。燒咗冇耐,個侍應見我哋仲有大把嘢未燒,聲都唔聲就攞咗我哋支燒烤夾,然後夾走咗條魷魚筒同攞走咗個雜菜煲過隔離爐度燒,仲要用完支叉又無攞番俾我哋,搞到我哋要自己起身攞番支叉,如是者重覆幾次。我哋心諗,如果係唔高興我哋太遲嚟,可以同我哋講已經冇爐端燒供應,俾得我哋叫但又對住我哋口黑面黑兼且無禮貌,真係好唔掂。

雖然我哋燒到過咗打佯時間,但係都仲有嘢未燒完,個侍應其實已經行咗過嚟幾次,最後佢叫另一位識英文嘅侍應嚟同我哋講要打佯需要埋單,咁我哋就話OK然後坐係度等張單,點知等極張單都唔嚟,望出去見到黑面侍應坐咗喺CASHIER度,個樣好似好唔耐煩,我哋至知原來要客人出去埋單,但搞笑在於個侍應又唔主動叫我哋。到埋完單,之前去開啲餐廳都會好禮貌咁同客人講多謝同再見,當然呢一間就好貫徹始終地咁無禮貌收完錢就算﹗

平心而論,啲嘢食係幾OK而且價錢實惠,但服務態度認真要改善一下。可能早小小去到服務會好啲啩,不過我哋就未必會再去幫襯。

This entry was posted in 北海道 and tagged , , . Bookmark the permalink.

1 則回應給 北海道之夏(八) – 釧路濕原

  1. Terry Liu 說:

    好少遇到呢D咁既服務。

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s