北海道之夏(六) – 釧路和商市場


日期 ﹕七月十日(上午)
行程 ﹕=> 釧路和商市場

一朝早,就由帶廣揸車向釧路和商市場出發。今日開始,北海道嘅天氣變差,一路揸車都落住大雨。好彩第一站係室內嘅漁市場,期望晏D去阿寒嘅時候,天氣會好番D啦。

一去到和商市場,我哋周圍逛下、睇下嘢先再食我哋嘅早餐+午餐。個市場有好多嘢賣,有乾貨、濕貨賣,亦有食堂。嗰度唔算好大,但環境好乾淨。

釧路和商市場
釧路和商市場
釧路和商市場

好…視察一輪之後,我哋就開始揀選今次嚟和商市場嘅主要目標-花咲蟹。又係喺和味無窮度見到,主持人喺個水池度揀咗一大隻花咲蟹上嚟,都只賣六千円,好抵。食嘅時候,Ricky san仲要講咗句,花咲蟹係北海道四種蟹裏面最有蟹味嘅。就係咁,我哋決定到北海道一定要試呢種蟹。

終於,我哋揀咗呢一間叫嶋田商店買花咲蟹。佢水池裏面嘅活花咲蟹比較多,而且價錢都OK。我哋揀好蟹之後,佢即刻幫我哋蒸,二十分鐘後就有得食。

其實和商市場係一個出名嘅海鮮市場,而當中勝手丼係佢最具特色嘅。勝手丼其實相等於車仔海鮮飯,買咗一個白飯之後,你就可以去到唔同嘅攤檔度,揀你鍾意嘅餸,各類海鮮、刺身都有。

買咗飯之後,我哋兩個分別去揀自己鍾意嘅餸,但由於我哋喜歡嘅食物都差唔多,我哋決定試下喺兩間唔同嘅舖度揀餸。

勝手丼
勝手丼

最後,我哋總共揀咗牡丹蝦、帆立貝、海膽、大拖羅、魚子同蟹柳。食完之後,覺得D材料尚算新鮮,但D味道就無乜特別。當中大拖羅同蟹柳較失望。(因為事前有D期望。) 感覺上,唔需要喺北海道都一樣食到呢種水準,而且勝手丼嘅價錢又唔算好平。

勝手丼
勝手丼

好…. 跟住就到隻花咲蟹。間店舖會將隻蟹蒸好再放入個膠兜,送到嚟我哋個位度。未蒸之前,隻蟹係深紅色嘅,熟咗之後會變成較淺色嘅橙紅色。隻蟹嘅腹部有好多蟹子,初初我哋有D擔心有咁多蟹子會唔會影響隻蟹嘅肉質同味道。後來發現,原來一大部份嘅花咲蟹都係有蟹子。可能係由於夏季係佢嘅繁殖期,而捉到嘅雌蟹比較多,所以有蟹子都係好正常。

花咲蟹
花咲蟹

開始食隻蟹,一打開個蓋,即刻有好多蟹汁溜出嚟,到開咗個蓋,上面仲有少少汁留係度。D汁好鲜甜、有好濃嘅蟹味。個蓋上面都有少量嘅蟹羔,味道都OK。

跟住食D蟹肉,每隻蟹腳中間都留有一層蛋白,D肉又嫩又鮮。感覺上好似我哋以前喺香港某間海鮮店食嘅花雕蒸蟹,不過呢度D蛋白完全係由D蟹汁形成,更有蟹味。而D肉要比花蟹嘅肉更嫩同更有蟹味,好正。

雖然唔敢講花咲蟹係北海道四種蟹之中最好食,但係今次呢隻蟹真係令我哋留下深刻印象。如果有機會喺夏天嚟北海道,一定一定要試下食即蒸嘅新鮮花咲蟹,包你一試難忘。原本我哋打算留番半隻蟹打包,等晏D再食,費事食得太飽。但最终我哋都忍唔住,食哂成隻蟹。

食完飯之後,我哋再買咗半個夕張蜜瓜同一個水蜜桃試下。個蜜瓜當然好味,而個水蜜桃亦好好食,未去皮已經聞到好香嘅桃味,去咗皮之後更加香到不得了,食落去超多汁、好清甜。

夕張蜜瓜
水蜜桃

(後記 : 近排我哋係美食展見到有花咲蟹賣,二話不說就買咗隻返嚟食。點知一食落去,D蟹肉經過冷藏之後,肉質變得較嚡,味道亦無咁鮮味。而且,冷凍嘅蟹亦無剛蒸熟嘅蟹嗰D好味嘅蟹汁同蛋白。完全係兩回事。)

This entry was posted in 北海道 and tagged , , , . Bookmark the permalink.

1 則回應給 北海道之夏(六) – 釧路和商市場

  1. Terry Liu 說:

    好好味!!!但我唔會去釧路,太遠嚕~其他地方冇得食新鮮花X蟹,一冷左就唔好食嘛>。<

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s