北海道之夏(十一) – 富良野


日期 ﹕七月十三日
行程 ﹕富良野 => 小樽

今日一起身已經見到有太陽晒入嚟,天氣晴朗,真係好彩。事關今日都會喺幾個花田遊覽,如果落雨就麻煩啦﹗

一出發,先去日之出公園,聽聞有好多人喺個度嘅愛之鐘下求婚。進咗入公園一陣就見到個山丘,遠望過去係一大片薰衣草,不過隻色好似唔係太紫。行近啲至發覺啲薰衣草其實都好紫下,而且仲好靚添。 隔離都有其他嘅花,當然唔夠薰衣草咁受歡迎。

個薰衣草山丘面積唔算好大,要影張獨照都有啲難度。呢個公園其實都有幾多香港人嚟,仲要係一家大細推住架BB車嗰種,影下影下就會突然聽到啲好熟悉嘅廣東話。見到有個日本妹妹好得意,忍唔住影咗個妹妹。

影完山丘就沿住旁邊嘅石級行上去。穿過咗個花拱門之後,就見到公園嘅trademark~愛之鐘。嗰度其實係一個幾大嘅觀景平台,四邊都可以俯瞰稻田同村莊景,其中一邊仲可以睇埋愛之鐘添!而中間就有啲枱凳俾人休息,同有一個再高啲嘅展望台俾人行上去睇景。企係高嘅展望台望出去愛之鐘嘅景都幾靚。

第二站去有吊車坐嘅町営ラベンダー園。呢個吊車會載你上山頂(不過其實路程好短),而沿途都滿佈薰衣草,就好似隻腳踩住啲薰衣草一樣,感覺好特別。在山頂望落去都係一片薰衣草原,有個老伯伯仲好寫意咁挨喺樹度寫生。係山頂可以睇嘅嘢唔算多,有啲人會選擇行經薰衣草山丘睇薰衣草順道行落山,我哋就喺山頂附近嘅薰衣草原影幾張相之後就搭番吊車落山。

第三站去彩香之里。因為之前在曰之出公園留耐咗時間,搞到連食晏嘅時間都冇埋,唯有喺呢度嘅小食亭醫肚。啲小食都OK喎,嗌咗薯餅、年糕同軟雪糕,都幾熱氣同頂胃!食完之後就拿拿林走去影相,事關之後仲有一個花田要去,時間都幾緊逼。

今日嘅天氣真係熱得緊要,加上之前嘅兩個花田已經睇咗同影咗唔少薰衣草,所以影相嘅意慾細咗好多。行咗冇耐見到有對香港嘅情侶喺度影緊婚紗照,都有啲戥佢地辛苦,天氣咁熱,不過個景真係幾靚嘅。除咗薰衣草之外,呢度仲有其他花種,不過就開得冇咁靚。

今日最後參觀的花田係最多人識嘅富田農場。途經Popura Farm,就泊低架車去食Tea。呢度出名嘅甜品係蜜瓜配紅豆加軟雪糕,我哋嗌咗一個嚟試。個樣好吸引,但食落去就一般般,因為個蜜瓜一啲都唔甜!!

去到富田農場,果然名不虛傳,啲遊客多到爆,人山人海,好多旅行團都係嚟呢度。除咗一大片薰衣草田之外,仲有兩個七色花田,細啲嗰個喺入口處附近,即薰衣草田旁。除咗有花睇之外,仲有幾間精品店同小食部,比起其他花田,呢個富田農場比較商業化,佢仲有一個小小嘅工場整薰衣草乾花開放俾遊客參觀。

本身我哋見人又多,自己又攰,諗住差唔多都係時候走,但係見到啲人係工場隔離嘅小路出出入入,基於八嘅心態就行上去望望,點知原來係另一個大啲嘅七色花田。其實之前都覺得奇怪,冇理由富田農場嘅花田咁細,原來仲有啲喺遠嘅地方! 呢個大嘅七色花田好行同好影好多,事關遊客少啲。

臨走前買咗支熟嘅黃色栗米試,味道就唔夠生嘅白色栗米咁甜。跟住就啟程去小樽。

This entry was posted in 北海道 and tagged , , , , , . Bookmark the permalink.

1 則回應給 北海道之夏(十一) – 富良野

  1. Terry Liu 說:

    好靚,不過好似冇咩特別好既野食@@

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s