北海道之夏(十) – 美瑛


日期 ﹕七月十二日
行程 ﹕=> 富良野 => 美瑛 => 富良野

今朝一早,我哋就由帶廣向美瑛出發。因為今日天氣唔多好,一路落住雨,所以盡量安排室內參觀,戶外嘅就留番聽日天氣好D嘅時候去。途中我哋經過富良野,見到有好多農場售賣蜜瓜,我哋駛咗入其中一間度睇下。一落車,老板娘就邀請我哋試食佢D蜜瓜,佢有紅肉同青肉嘅富良野蜜瓜賣。我哋覺得青肉比紅肉嘅好食,決定買返個過幾日食。老板娘話兩個賣一千五百円,唔係貴。不過我哋見D蜜瓜都係已經好熟,係要盡快食嘅,我哋就問老板娘有無D生少少嘅可以留番過幾日先食。咁佢就比咗一個賣一千円嘅我哋,但當我哋俾完錢想走嘅時候,老板娘竟然話免費送多個較熟嘅蜜瓜俾我哋,真係好抵﹗當晚我哋就食咗免費嗰個蜜瓜,好甜,都幾好食,不過就甜到有啲choke喉。

富良野蜜瓜
富良野蜜瓜

買完蜜瓜後就去我哋今日參觀嘅第一站 ~ 芝士工房。

富良野芝士工房
富良野芝士工房

一去到即刻去一樓嘅食品部。見到有三款芝士提供試食﹕Sepia,Maisons de Pierre,Wine Cheddar,不過D味道唔太啱我哋。

跟住,終於見到今日的主角 ~ 富良野牛奶同芝士蛋糕,價錢比旅遊書寫嘅貴咗小小。除咗呢兩款,我哋仲買咗芝士撻、芝士批同蘋果汁。

呢度有個小小嘅休息區俾你坐低慢慢食,仲有個靚view俾你望住出面睇景,唔錯唔錯。

支牛奶真係好好味,好香嘅奶味。其實我哋沿路都有喺超市同便利店買盒裝牛奶,味道已經比香港買嘅曰本牛奶好啲同平啲,但係點都唔夠呢度嘅富良野牛奶咁香咁濃。如果鍾意飲牛奶嘅朋友們,不妨飲多幾支,事關唔係度度有得買,我哋之後都淨係喺富田農場見過(不過貴小小)。跟住就試呢度好出名嘅芝士蛋糕,一咬落去好鬆軟,滲出淡淡嘅芝士味,真係好好味。另外個芝士撻同芝士批都幾好味,係"漏"咗小小。

攻陷完呢堆甜品,就要試下另一個必試嘅甜品 ~ 雪糕! 有牛奶、南瓜、粟米味等等。我哋要咗牛奶同粟米味,牛奶雪糕依然香滑,粟米味就普普通通。食完啲甜品都飽咗七八成,連午餐都慳番食唔落!

下一站開始,我哋會進入美瑛嘅範圍。我哋會揸車沿Paramonic Road參觀,然後再到Patchwork Road。沿路經過早幾日買生白粟米嘅地方,走去買多支粟米食,一樣咁好味。

到咗Paramonic Road,首先到美馬牛小學[Mapcode: 349 730 066]睇下。其實近距離望,真係無乜特別,相信要好似D明信片咁,遠距離咁影至靚。

跟住,我哋就到拓真館[Mapcode: 349 704 305]睇下攝影大師前田真三嘅相展。呢個展覽係免費入場,裏面除咗有前田真三嘅攝影作品外,仲有佢個仔前田晃嘅作品,啲相嘅構圖同意境都好好,值得去睇一睇。不過館內係禁止拍照,唔可以影相留念。

拓真館拓真館

之後去咗展望台 ~ 千代田之丘[Mapcode: 349 734 462]睇景。唔知點解個展望台居然一個人都冇,初時仲以為去錯咗地方!!其實從展望台望出去嘅景色都幾靚,一片片綠油油嘅稻草田,美中不足嘅係成日落住雨,冇太陽。

千代田之丘

離開咗千代田之丘,美瑛沿途嘅風景都好靚,我哋隨便喺路邊停車影下相。

雖然個肚仲好"頂",但係點都要到三愛之丘茶屋[Mapcode: 349 792 477]tea一tea,呢間茶屋係由一對夫婦經營。外面落緊雨,我哋揀咗坐室內嘅bar枱,前面有個大窗,坐係度就可以透過大窗見到出面嘅稻田景色。我哋嗌咗個咖啡雪糕試,果然如其他blog友寫嘅一樣,好好味,雪糕軟滑,咖啡香濃。老板娘好有心思,特登攞支有笑樣嘅匙羹俾我哋用。老板娘仲好友善咁叫我哋隨便參觀出面嘅薰衣草原。如果下次有機會嚟開呢頭,一定再嚟幫襯。

三愛之丘茶屋
三愛之丘茶屋

Tea完後就出發去阿斗夢之丘[Mapcode: 389 071 595]。一落車就覺得有啲凍,點知越行上去就越凍。雖然呢個花田比較細,但係起碼今次見到薰衣草,好過之前跟團去嘅四季彩之丘。不過如果同之後去嘅花田比較,阿斗夢之丘嘅花就唔算好靚。我哋逗留咗一陣就走。

阿斗夢之丘
阿斗夢之丘

跟住我哋去睇呢度必去嘅"Ken&Mary之木"[Mapcode: 389 071 670]同"親子之木"[Mapcode: 389 098 482],係車度參觀同影相真係舒服,郁都唔駛郁,就算落雨天都無問題。

Ken&Mary之木
親子之木

終於到咗食晚飯嘅時間,今次我哋會試下喺香港都食過嘅山頭火喺美瑛嘅分店。

山頭火美瑛店

我哋嗌咗餃子定食同鹽味叉燒拉麵。之前喺札幌嘅味之時計台食嘅味噌拉麵已經覺得好好食,而山頭火嘅鹽味拉麵亦都好好食,D湯清,麵又爽口,而舊叉燒好鬆軟、好淋。最估唔到係佢嘅餃子都好出色,皮薄餡靚,煎得又香口,好食過味之時計台嘅餃子好多。

由於今次行程去唔到旭川,唔可以試下佢總店嘅味道,但我哋對美瑛分店嘅水準已經好滿意,至少比香港分店嘅水準高好多。

食完飯就去今日最後一個景點 ~ 葡萄酒工場[Mapcode: 349 060 759]。嚟呢度唔係為品嘗葡萄酒,而係嚟睇佢出面嗰個薰衣草小山岳。係夏天嘅夜晚,工場會為薰衣草園亮燈,同日頭睇薰衣草嘅感覺好唔同。完成呢個景點後就返咗附近嘅民宿休息。

This entry was posted in 北海道 and tagged , , , , , , , , . Bookmark the permalink.

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s