日本東北雪國之旅(一) – 米沢


日期 ﹕一月廿二日
天氣 ﹕天晴 → 大雪
行程 ﹕香港 → 東京 → 米沢

今次嘅旅行,半年前就已經開始籌備。但由於個旅程同農歷新年有重疊,而且日數仲要多過七日,如果買CX嘅機票會比較貴。最終,我哋買咗Delta嘅來回東京機票,連附加費都只係四千蚊左右。喺農歷新年檔期,算係好抵。


搭嘅係朝早8點鐘機,一早就要到機場。Delta條龍都幾長,好彩一早print咗boarding pass,可以排條短D嘅龍。

當飛機到達東京,準備落機嘅時候,發現有個平時一齊打籃球嘅同事,坐正喺我後面,真係好巧合。佢會喺東京玩一個禮拜,相信佢返香港嘅時候一定會滿載而歸。

之後,我哋就去買JR East Pass,搭新幹線向第一站,山形縣嘅米沢出發。由成田機場到米沢,計埋轉車時間,大約要三個鐘。

成田往東京嘅特快列車上面,有好多位俾人擺行李,而且仲有得上鎖。但係新幹線上面,每卡車只有少量行李架,仲要個架位好細,如果俾人霸咗,啲行李都唔知擺喺邊好!

當架火車一路由東京到福島,再駛向米沢,窗外嘅景色變得愈來愈白。去到米沢站附近,直頭白濛濛一遍,所有樹木同建築物都蓋住一層厚厚嘅白雪。其實新幹線上面係有暖氣,但當架車過咗福島之後,我哋就覺得愈來愈凍。我哋未落車,就已經要著住禦寒衣服同埋黐埋暖包。落車之後就當然更寒冷,完全感覺到自己已經進入咗雪國嘅國境。

落車後,首先到旅遊中心攞地圖,然後就到Toyota攞車。由火車站到租車嘅地方,只需要五分鐘左右嘅路程。但由於行人路上鋪滿哂雪,旅行喼要靠拖先至得,個碌完全係無哂用。所以呢五分鐘都幾難行。

攞車之後,我哋就向今日唯一既行程米沢牛晚餐進發。食米沢牛有兩間較為出名,一間係登喜波,另一間係黃木。原本想訂登喜波,但佢話我哋預定到達時間7:30pm已經係佢哋last order時間。哈! 真係好早休息。好彩間黃木無咁嘅問題,所以我哋就去黃木食。

黃木嘅餐廳叫金剛閣,分開幾層,提供唔同煮法嘅牛。我哋揀咗壽喜燒同shabu shabu,所以到二樓昆沙門進餐。(日本人計樓層嘅方法同唐樓一樣,地面係叫一樓。)

我哋叫咗一客130克嘅極上米沢牛壽喜燒,同埋一客普通嘅米沢牛shabu shabu,想試下最高級同普通米沢牛有幾大嘅分別。兩客牛嘅價錢分別係7千幾同2千幾円。

我哋首先試下個極上米沢牛,130克有六片薄簿嘅牛肉,每片嘅雪花紋都好靚。壽喜燒嘅食法,侍應會幫我哋用牛嘅脂肪起煱,先煮D雜菜做個底,上面再放兩片米沢牛。然後就加壽喜燒嘅湯汁落個煱度煮牛肉,淥幾淥D牛肉就食得。

試食個極上米沢牛,一放入口覺得好鮮味,咬落去好淋,立即溶化。雖然只係薄簿嘅一片,但已經好好食。

然後再試下個米沢牛shabu shabu。首先,牛肉嘅級數好明顯唔同,望落去係鮮粉紅色,好有光澤,但就無乜雪花紋。shabu shabu之後放入口,感覺都係好淋,入口即溶。但係就無極上牛嗰種鮮味,同埋缺乏牛肉溶化之後,留喺口入面嘅嗰種纖維。我哋之後再試下用壽喜燒汁煮D普通米沢牛,味道係好食咗,但分別其實唔大。

總括呢一餐,我哋好滿意,米沢牛果然不愧為日本三大牛之一,真係好好食。
食完晚餐之後,我哋就揸車返酒店。今晚落嘅雪唔細,食飯只不過食咗約個半鐘頭,但攞車嘅時候,架車已經舖咗一層雪。

返酒店途中,經過超級市場。我哋就買咗D零食同士多啤梨返酒店食。D士多啤梨都幾好食。

This entry was posted in 遊記, 日本東北 and tagged , . Bookmark the permalink.

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s