日本東北雪國之旅(二) – 会津若松、豬苗代湖


日期 ﹕一月廿三日
天氣 ﹕大雪 → 天陰
行程 ﹕米沢 → 会津若松 → 豬苗代湖 → 五色沼 → 福島市

今日嘅行程,首先係去西会津若松摘士多啤梨。由於琴晚一直落雪落到今朝,我哋攞車嘅時候,發現架車上面積咗一層厚厚嘅雪。所以我哋出車之前,首先要清理咗車上面嘅雪先。

其實清理積雪都唔容易o架,車上面嘅雪掃嚟掃去都掃唔乾淨,最終我只係清理好車窗同倒後鏡上嘅積雪,其他地方掃下就算。

從車上積雪嘅形態,大約都估到琴晚嘅風向。

個天一直落住雪,直到我清理乾淨架車嘅時候,發現自己身上都積咗一層薄簿嘅雪。

由米沢出發去会津若松,大約需要個半鐘,沿途除咗市中心一部份嘅路外,大部份地方都被冰雪覆蓋住。雖然令到我哋揸車比較危險,須要慢駛,但沿路上嘅雪景都好靚,慢慢行反而可以欣賞一下風景。

摘士多啤梨嘅地方比較難搵,GPS搵到嘅電話登記地點,只不過係農業商會嘅辨事處,我哋需要根據地圖,再揸五分鐘左右嘅車先揾到個温室果園。個温室唔算好大,大約有10米乘60米嘅地方,種滿一排排嘅士多啤梨。

俾咗錢之後,溫室主人首先教我哋應該點樣摘士多啤梨,會容易D摘又唔會傷害到棵植物。跟住,我哋就開始30分鐘任摘/食士多啤梨嘅時間。可能時間尚早,整個温室都只係得我哋兩個客人,令我哋可以好自由咁揀士多啤梨食(直到尾段,先有另外一家三口日本人嚟到) 。起初我哋會試下唔同size唔同形狀嘅士多啤梨,之後就鎖定咗食大而鮮紅嘅士多啤梨,因為比較清甜好食。食咗十五分鐘左右,我老婆已經飽咗,我亦開始有D飽。於是,我哋專揀D最大粒嘅士多啤梨嚟食同影相。未夠鐘,我哋已經好飽咁離開個温室。

之後,我哋向會津若松嘅鶴之城出發。原定十幾分鐘嘅車程,比預期中長。首先,GPS指示嘅地點係錯嘅,好彩路上嘅指示牌好清晰,我哋可以跟住走。但係去到鶴之城附近,我哋兜咗一個圈,都只係見到民居,完全見唔到個城池。

兜咗一陣,終於俾我哋揾到鶴之城嘅停車場,我哋泊低架車之後再行向城池方向。其實我哋對日本嘅城池唔係好大興趣,一來對日本嘅歷史唔熟悉,二來日本嘅城池建築規模唔及得中國同歐洲。加插鶴之城嘅行程,主要係因為順路經過。

落車之後,沿路積咗好高嘅雪,對於我哋好少見雪嘅人嚟講,覺得好靚好有趣。結果我同老婆一路喺度玩雪、擲雪球同影相,仲訓埋喺雪地上製造人形,玩得好開心。

而個鶴之城,因為外圍有工程進行,圍起咗工作架,我哋只係影咗幾張相就走咗。

之後食晏,原本打算去喜多方市試下日本三大拉麵之一嘅喜多方拉麵。但由於時間有限,我哋唯有執行個backup plan,去附近一間叫做來夢喜多方拉麵嘅舖頭食晏。

一坐低,我哋叫咗一客正油喜多方拉麵,同埋一客鹽味喜多方拉麵。兩客麵都有好多片豬肉喺上面,望落差唔多,主要係個湯底唔同。首先試下個正油拉麵,D麵條比較粗,望落有D不規則,食落幾淋幾彈牙。D湯嘅味道幾特別,唔算好濃郁,味道唔錯。到D豬肉,肉片好淋,放入口有一咬即溶嘅感覺,味道好甘香,好好食。

再試個鹽味拉麵,雖然(好似)只係個湯底唔同,但食落去就連拉麵同豬肉嘅味道都好唔同。我哋都係鍾意個正油拉麵多D。

另外仲叫咗一客餃子,味道好得。餃子皮整得好薄,但唔會穿。個底煎得好香,口感脆脆哋。而餃子本身好淋,食落好好味。

食完晏之後,我哋就去豬苗代湖,主要目的係去睇天鵝。去到湖邊,見到積咗好高嘅雪,我哋要爬上雪堆至見到個湖。

湖面上,除咗見到天鵝,仲有好多鴨仔。有好多人喺湖邊餵佢哋。

逗留咗一陣,我哋就離開向五色沼出發。安排行程嘅時候,都預咗五色沼喺冬天會有一部份道路會封閉,但見人哋嘅blog話冬天都可以睇到一個沼,又睇見紅葉x楓影得佢好靚,諗住去參觀完第一個沼就離開。點知一去到,見到大部份都俾D雪覆蓋住,好失望。我哋唯有早D離開,向福島市嘅酒店進發。

沿途好塞車,花咗約四十五分鐘先至行到兩公里路。去到大路嘅時候,先知道往福島嘅一段高速公路原來封咗,要改道郡山往福島。沿途所有車都只能夠慢駛,原本只係個半鐘嘅車程,最終花咗三個鐘先到。

晚餐方面,福島市無乜出名嘅食肆,我哋上綱揾咗間蕎麥麵店食晚餐。D蕎麥麵嘅味道普普通通,反而D豬扒飯就好好食。

This entry was posted in 遊記, 日本東北 and tagged , , , , . Bookmark the permalink.

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s